تلبسين العشب.. والجدب بدوي تسكنينه

غبشت عينه على ليل تكسر في سراجه

ما صدقتي.. والله انك ما صدقتي والغبينه

تضحكين .. ومهمهان القيظ يومي بك عجاجه

جاهلة تسقي ترابه .. والعطش تحفر يدينه

واشغلت بالعشب حيٍ غض طرفه عن حجاجه

تقدرين الآن حتى.. تسألين اللي تبينه

عن مزاجه .. كيف يعني ما عصاه الا مزاجه

تقدرين بعمق ما يطري عليك وتكتمينه

تكذبين .. الا على صدر تشيلين احتجاجه

خبلت بي عذبة الطلات .. هالبنت الحزينة

في نحرها من قلايدها مساكين تواجه

مقبله.. واقول ساق الدرب مكسوره طعينه

يجبر الله يا صويب الدرب خطوات المواجه

ممحله حتى يسيل الجوع ويسنبل جرينه

سنبله .. واثر المطر فلاح وجروحه خراجه

وش بعد يا عذبة الطلات قلت وتنكرينه

الوكاد ان بدويِّك ما نفته الا فجاجه

لو صدقتي.. كان هذا العشب عني تنفحينه

قلعة اللي غبشت عينه على عتمة زجاجه

تكتمين.. أو تكذبين .. او ما سمعتي تجهلينه

ما علي .. الغاية اني قلت .. وسكوتك سماجه