لاتشترين هموم تكثر أوجاعي

أصبر تزين الليالي ثم أشترني

ولا تكثر أعذارك اللي مالها داعي

وتهدي ظماي وعودك وأنت خابرني

عطش وشوقي لشوفك يخلف أسناعي

وماهمك إلا بحلو الهرج تقهرني

عيت عيونك لدمعة عيني إتراعي

ماتردع الظلم وإلا منك تنصرني

كني معك في سواليف المساء واعي

حتى بنومي تمنيني وتنهرني

وأفز لك من حلاوة النوم مرتاعي

نشوان من عقب طيف منك خدرني

عليك من كثر حبي صاحت أسماعي

أمنك غصب عليه وانت تغدرني

خلك على قولتك مازانت أوضاعي

وأحفر قبر من يمين الدرب وأقبرني