مسا البارِح على ذِكراك يا المجحود

خذاني لوين ما ادري بس يا الشاقي

تمايل بي على ردون الورق عنقود

وقمت أهش حبري واخنق اوراقي

أدوِّرْني على وجهِك وأنا مفقود

والاقيِني هِنا باقي بَلا باقي

تِذكرني بسيف الله و الأخُدود

ليا مِن ضاق صدر الحق بآفاقي

وبِياضك من ورى عِبْس الليال السُّود

يِصِب النور في عتمة احداقي

وتراتيلك على صهلة هبوب النود

تِدِك الخوف لا نفنف على اعماقي

وسماحة وجهِك الطاهِر لنا يا عود

يبشِّرني بطِيب الوقت لو ضاقي

أشوفك طود , لكِن من يشوفك طود

يموت بقيد أنت انسان ارهاقي

أسد ليه الزّئير وما معك أسود ؟

تْضيْغم بأيش وانت بكف أنفاقي ؟

تِمْخلا بك زئيرِك والزمان قيود

وتِغشْواك السواد ولاح برَّاقي

يِسرّيني نحيبِِك لاصرخ مضهود

من أصحابي وسيّد زمرة اعراقي

وثِرْت بلا إله إلا هو المعبود

وثار من الغضب ثلثين خفّاقي

على دِهْم المهار ونفحة البارود

اسوق الموت فيني ما انثنى ساقي

تِعِبْت أغمض عيوني ثلاث عقود

وانا ماعادت اخلاقي هي أخلاقي

يعود العِز ولا يا عسى ما يعود

مادامه يامِيَةْ مِلْيون ما فاقي

نبيع من الكرامه الف والمردود

وِجَع خمسين,واعراقي وش أعراقي

أجل ما عاد بَهْ شيٍّ لنا يا كود

نسُوق الموت والباقي على الباقي