اسكت دقيقة ثانيه لحظة سماااع

هذا حديث الناس يومي اوصفه

مثل الفلم لامن تكلمت استمااااع

قوم املك الخلق بحروف مرهفه

للمره الاولى على العالم يذاع

حسنك على هيئة قصيد وفلسفة

وصفت بك مثنى, ثلاثة, ورباع

واول صفة تغار من ثاني صفة

سويت من لا شئ ,قدر المستطاع

رفعت سعرك فوق سعرالتكلفة

صرت اختراع ولي براءة الاختراع

فرضت للي يب يشوفك تعرفة

معلم يزورونه هواة الاطلاع

حتى عديم الذائقه يستلطفه

كم اجتماع يصير لاجلك واجتماع

وانت بيديك تقعده وتوقفه

حطيت لك في داخل القلب انطباع

انك اذا حبيت تقدر تخطفه

كن بينك وبينه اخوه بالرضاع

تقرب له ويعرفك عز المعرفة

واليوم جيت وشكلها منك وداع

جيت لكيان اسسك, تستهدفه

مع احترامي للشجاعه يا شجاع

كنت اتبسم والنهايه مؤسفه

لا تحسب الي ضيعك بالحب ضاع

انته غلطت وغلطتك ذي مكلفه

ترى الهجوم افضل وسيله للدفاع

تعرف هدوئي , وانفعالي تعرفه

انا نصبتك مثل ما ينصب شراع

وانا اردك عند ذيك الارصفه