ركبت البحر وشراعي هواك ومركبي صدرك

أدل دروبي ابحسك الين اوصل بداياتي

أشوف الكون بعيونك وأعيش سنيني ابعمرك

يطل الصبح من وجهك وتحلى بليلك أوقاتي

بدونك فرحتي تذبل وأظل اسقيها من صبرك

واهجر كل شي فيني عيوني .. شعري وشفاتي

ولي شفت الزهر يرقص أتوه بنفحة من عطرك

ويوصلني صدى صوتك يطاردني بمتاهاتي

تناديني بدفا شوقك وأنا بردانة من هجرك

واحس دفاك يبعثرني ويلملم باقي شتاتي

وأصير برجعتك طفلة أداعب مدك وجزرك

واذكر كل شي يطري علي .. وأهجر سكاتي

واهمسلك أنا أحبك لجل تخفيها في سرك

وكل ما ضاق بك صدرك ترددها بهمساتي

أنا ادري احترت في حبي وأنا محتارة في أمرك

وأحبك كلمةٍ تعجز تشيل الحب في ذاتي

حدودي في الهوى أبعد من نجومك ومن قمرك

مثل ذاك السراب اللي أشوفه في خيالاتي

حبيبي لو بيكتبني الهوى قصة على سطرك

بيبدي وينتهي بإسمك لأنك كل حكاياتي