على أثر ماصابني من نوبة احباط وضجر

كني بقول الله وأكبر مابقى شي أخسره

كأنت طموحاتي تعديبي على سطح القمر

واليوم ماعادت تجازو بي حواف المسطره

ماني بشاعر بس لي معنى ولي وزن وبحر

بالمختصر هاوي شعر خارج حدود السيطره

أفنيت في الدنياء عمر اتعلم اشلون البشر

تخطي وترجع ترتكب نفس الخطأ وتكرره

وكل ماقلت أستتب الأمن والحال أستقر

فجأه لقيت أهل الشعر وأجواء الشعر متوتره

والساحه الي مانفع معها دواء وخز الأبر

تحتاج الى جراح متخصص بعلم القسطره

ولا النظر 6 6 بفحص المختبر

بس الخطر والمشكله أنف وأذن وحنجره

وش تنتظر يامتقن اللعبه بإساليب الهكر

وش تنتظر والظاهره ترقى لحد المسخره

مليت مليت اسمعك صبر صبر صبر صبر

الى متى تجبرني اتحمل قصايد وثرثره

شاعر ويخلط بين أساليب العمودي والنثر

والشعر قد لايدركه وشي مايتصوره

ولايعيش الا الجزل طال الزمن ولاقصر

اما الهزل قد نسمعه مره ولانتذكره

اما الهنوف الي تمر الذاكره صوت وصور

أستنفدت كل الصبر من أوله لين أخره

تخطي وتجرح كل مره والعذر نفس العذر

ياكثر ماهي تستغل العفو عند المقدره

أن اقبلت وشفتها أنساك ياوجه الفقر

وأن ادبرت ذكرت حجم أقصادي المتأخره

خسرتها ضمن الطموح الي على سطح القمر

وأستغفر الله لوبقول أن مابقى شي أخسره