الله على اللي شوحته تقطع الدار

يوصل غريب الدار ديرة ربوعه

أبيه والله مير مغلين الاسعار

والبنك ماادله ولااعرف فروعه

وذي حالة الدنيا لها ادوار وادوار

يومن تواصلنا ويومن قطوعه

وكل البشر فيهم فقارا وتجار

ونفوس تتحمل والاخرى جزوعه

وحتى بنوك النقد تعجز وتنهار

ماهوب انا عجزي بعاد(ن) رموعه

بس المهم ودون توضيح الاسرار

وضعي ووضع الجيب شكله ونوعه

شريت لي جيب(ن)عسى ابوه للنار

بانت عذاريبه من اول اسبوعه

مزعج مع الصحراء ومزعج مع القار

ومن يركبه لازم يسكر سموعه

مثل الشبح ماينقصه غير طيار

شكله وتصميمه وممشاه روعه

من خف دمه مابقى فيه مسمار

ولايركبون عيال الانذال نوعه

مايركبون الا سفاري وفكسار

آخر زمان(ن) جعل بقعا تصوعه

خلا رجال المرجله مالهم كار

لذيخ لو يبكي مسحنا دموعه

الذيخ يشبع فالفضايل والاسوار

والذيب مايدرى بفقره وجوعه

وقت(ن) يخلي صاحي الفكر يحتار

ويشوف من هول الدهر مايروعه

تلقى الفقير وفزعته خمسة انفار

وتلقى الغني كل الجماعه فزوعه

ياعاشق الدنيا ترى مالها جار

كما واحد(ن) في حبها طار شوعه

اليوم تضحك له وتعطيه الانذار

وبكره تلحويها محاني ضلوعه

خلك على صكات الايام صبار

ويوم(ن) يفوتك لاتمنى رجوعه

اقفى على مافيه من خير واشرار

نجم(ن) هوى مايندرى عن طلوعه

وماهي على كيفك تمنى وتختار

ابعد على المخلوق من حب كوعه

يخبرك من ذاق المتاعب والامرار

وحاول ولاجاله زمانه بطوعه

ومرت به الدنيا على بعض الاقطار

في رحلة(ن) ماغيرت من طبوعه

والله ماواطن عيشة الذل والعار

مادام لي شيمه ونفس قنوعه

وقرش(ن) عزيز افضل من الفين دينار

من مصدر(ن) للذل يعلن خضوعه

ولو الوساده من صلافيح الاحجار

للراس اخير من الترف والميوعه