1
لمَّا الحزن الساكن صوتك ..
أعلن موتك
شفتك .. من مرجيحة روحي ..
واقع تحت السد العالي
اللي بيفصل بيني وبينك ..
شفتك لكن غصبن عني ..وعنك ..
زمن الحلم خلاص .. انداس !!
2
ما تلفش عكس الأرض ..
استنى عقارب عمرك ..
تحسب زاوية ميلك
قبل ما بكره تشيل الحمل ..
وتبدأ ف الدوران ..
لو ملت ..
ساعتها هيضحك طوب الأرض .. عليك !!
3
مع إنك حلم بسيط .. عريان ..
ويادوب مستور بالتوت
بتموت ..
والناس البسطا ..
عليك ..
طوابير !!
4
دوسيهات قديمة ف مكتبي
مقفولة من ساعة خروجك منها
اكمنها من مفرداتك كلها
وانت الوحيد الحي من فوق الورق
بين السطور !