أذكرك مع صدح فيروز الأغاني

مع بداية عامنا ويش الجديد ؟

شوق ، وغياب ، وكسل مشي الثواني

وانتظار الباب ساعين البريد !

انتظرتك .. لين برد الما كواني

انتظرت بفارغ أحزاني .. وحيد

والليالي شمعها ذاب .. وبكاني

من كثر ما استرجع الذكرى واعيد

كل ما شوقي لشبّاكك خذاني

ردني عن شوفك السور الحديد

مرّ عيد .. ولا وصلت ، ومرّ ثاني

وانت تعرف ويش معنى ( يمرّ عيد )

ماني مغيّر مع الفرقى مكاني

لنّي أدري بك تجي لوّك بعيد

صاحبي .. لك كل شكري وامتناني

اعتبرني ميّت احساس وبليد

لا اتّعذر ؛ والعذر غيّر معاني

لا تذرّ الملح في جرحي التليد

يخت أمانينا هجر حضن المواني

ظنّك ان مرّ العمر نقدر نصيد !

صاحبي .. والعمر محتاج لأماني

لاجل تحيا وانت واعي ما تريد

وانت امانيّي ، وتفسير الأغاني

وانت حلمي ، وانت تبرير القصيد

وانت قنديلي إذا همّي غشاني

والفرح لحضورك الباهي وليد

خلّني .. لا جيت اباغرق بك عشاني

لا تنجّيني من الموت السعيد !!