نفد صبر الكراسي .. ملّ كوب الشاي !

صرخ هذا القلم في غيبتك : "كافي" !

كأنّ الريح من خلف الدرايش ناي

يقسّم لي لحن غيّابي الدافي

وحيد .. وما يعلّلني سوى ذكراي

تجاذبني الحديث ، وتسكن لحافي

بكى حزن الشوارع من حنين خطاي

بدونك هالعمر رمضى ، وانا حافي

وحشت اغلى الأماكن في وطن منفاي

تحمّلني سلام ؛ وشوقها خافي

نجي نقطف زهر .. يسراك في يمناي

ومرّ العام ، واصبح هالزهر سافي !

تعال .. وطبّب جروحي ، وعزّ بكاي

تعال ابذل سبب .. والله هو الشافي

كثير اهمس باِذن طفل انتظارك : "جاي"

تعبت المح بعينه : "صاحبك جافي"

وهنت .. وجيت ادوّر للمشاعر راي

يوقّد لي فتيل سراجي الطافي

رحلت ، وحيل تتعبني منى بكراي

عسى يعود الربيع ان عدّت (عجافي)

بذلت العمر كلّه .. في سبيل مناي

وعلى كتف القدر .. شوف البخت غافي !