ويل قلبي منك يا سيد الدلال

البشر من طين وأنته من عسل

يا شبيه الريم في جرد السهال

عينه وعنقه وطبعه لا جفل

عين جهمة ليل ورموش طوال

والهدب مكحول ما يبغى كحل

والندى عطر على الخدين سال

دام خدك ورد ما طبه نحل

والخصر ناحل كما خصر الدلال

والنحر بدر ٍضيا نوره كمل

والجدايل شقر ما فيها جدال

ذيل صفرا فوقها قرم زعل

ميزك ربي بحسنات الخصال

الستر فيها يجاريه الخجل

والنسب وافي من أعمام وخوال

يعرف العارف ويجهل من جهل

من رجال تفتخر فيها الرجال

للعدا فرسان تنطح ما تذل

كنت ابي البس شماغي والعقال

واخطبك منهم وشرع الله عدل

مير ما حطيت بالراس أحتمال

أن شمسي من على الدنيا تزل

ما سمعت الا لسان الحال قال

ما أصدق! كيف عن عيني رحل؟

ضاقت الدنيا من يمين وشمال

وما بقى في كفي الخالي عمل

قال قلبي : يا هوى تكفى تعال

وكان قول العين : دمعات تهل

مرة منك تفاجئت بسؤال

قلت لي : نسيان من تهوى سهل ؟

الاجابه جت في سهر الليال

( ما صمل قلبي وعقلي ما صمل )

طالت السيره واشوف الليل طال

والامل مفقود محتاج للإمل

فلم وأحداثه أماني من محال

وبالنهايه أنكسر فيه البطل