ما طاح هم الليالي لو يطيح الحطب

وأنا أغتسل عن غرامك بالصبر والونين

كلمة أحبك صدى .. مردود كلمة تعب

حكاية ما تسولف غير دمع و حنين

هذا المصير الكئيب اللي علي أنكتب

لوحة حزن غامقه  فيها عيون ويدين

مليت أناظر يميني وش خسر وش كسب

وتعبت أدوّر عذر مل اليسار اليمين

رضيت أكون السلالم  ووصلك للسحب

تقطف من نجوم عمري كل شي ثمين

شفتك صغير وبريء وكان وقتي صعب

وعودت همي لعينك يختفي ما يبين

وخليت قلبي حديقه  والمشاعر لعب

وكبرت فيني وشفتك ثالث الوالدين

لجلك ضحك قلب ما يضحك ورحب هدب

ولجلك رخصت الجواب وشلت لك كل سين

ما اظن عاشق عشق مثلي ومثلي وهب

أصابعي شمع والقاسي عشانك يلين

وخسرت أجمل سنين العمر وأنت السبب

ومن صدمتي ما اصدق كل كلمة خدين

لكن أبسئل سؤال ولا تظنه عتب

لو تعتذر لي بتقدر تعتذر للسنين ؟

وقّف ولا ترجي الرجعه ولو هي غصب

ما جيت طالب هناي ولا رجيتك ضنين

دام الذهب لو تردى وقت يبقى ذهب

شفت التجارب تبيّن كل معدن دفين

غنيت لحن الشموخ ودمعتي تنسحب

وقررت أودع غرامك بس في كلمتين

ما عاد فيني صبر يابو الحسب والنسب

الله يسامحك والفرقا على القلب دين

لكنّ قبل المفارق ودي اطلب طلب

عشان خاطر هوانا  لا تقفي حزين