ابسألك وإنتي على أوّل سنينك

إنتي بشر؟ ولا جزء من سحابة؟

ليه أسألك؟ وإنتي شفاهك تدينك

وعيونك الثنتين فيها الإجابة؟

جوري وتصغر كل أنثى ف( عينك )

وتعيش أيّة رغبةٍ فالكتابة

وتموت أيّة ضيقةٍ في يدينك

مادامها أجمل رموز الرحابة

ويحطّ عصفور الفرح في جبينك

الله يلوم اللي يلوم إقترابه

وسرب النحل لا مرّ في شفتينك

لقى بها اللي يذكرون الدوا به

ربة حسن ، غطى على الزين زينك

لو يعطى نصفه للفقير إغتنى به

يمّمت لك قلبي وجيتك رهينك

أمّا حياة القلب ، ولاّ ذهابه