إذا جالك خبر موتي وعينك فاض مدمعها

وشفت الناس تبكيني وترثي أحمد المرحوم

وتسترجع تفاصيلي من أروعها لـ أفضعها

وتتمنى الزمن يرجع وتجمعنا الأماني يوم

وتتمنى تلاقيني وعشرتنا ترجّعها

عشان تقول يا أحمد أنا آسف..أنا مصدوم

ترى موتك ذبح روحي وفجّر كل مواجعها

يليت الموت غيّبني قبل ه الواقع المشؤوم

تخيّل وقتها حالك وحال الناس أجمعها

هلي..ربعي..كتاباتي..قصيدي وشعري المهموم

أموت وأترك عيونك أسيره في مدامعها

ويذبل هالغرام اللي جمعنا ظالم ومظلوم

وتتذكر جروح(ن) كنت فيني دوم تزرعها

وتبكي بالألم ندمان وتغرق ف العتب واللوم

ويكبر فيك حزنك لين هالدنيا تقاطعها

وتوقف فوق جثماني وتصرخ ياحبيبي قوم

أنا آسف..أنا آسف..دخيلك قوم وإسمعها

حبيبي قوم لاتترك بدونك خافقي محروم

تعال أحتاجك الليله ، أبي عيني تدلّعها

أبي أجلس معك لحظه،أبي نسهر وننسى النوم

تخيّل هالحكي يصبح حقيقه صعب تمنعها

ويبقى الموت ياخلّي ، علينا واقع(ن) محتوم

وإذا جالك خبر موتي ، وعينك فاض مدمعها

أبيك تقول يا الله ، إغفر لـ أحمد المرحوم ..