تعدّاك الخطا واللي تقوله ماعليه غبار

وصدمات الغلا لا جات ، تراها ماتجي سهله

أنا ياخوي صدقني تراني منهك ومنهار

وكل جرح(ن) تلبسني ، زرع في خافقي عله

رفيقك للهوى أهدى سنينه والألم تذكار

وفا للغاده اللي ما وفت ف إحساسها مثله

عصف بي ه الأسى وإجتاح مابين الضلوع إعصار

وأنا واقف أطالعها وشفت ف إيدها الدبله

جنون إبتزني فجأه وطوّق جملة الأفكار

وقلت بطيش من قهري ذبحتي الروح يانذله

غصب أخطيت يا ماجد ، وأنا ماني ترى غدّار

أنا من قسوة الموقف ، بكيت وقلت ه الجمله

محال الساقي يتجنّى ويجرح رقة الأزهار

وأنا ساقيها من حبي شراب الود في دله

حشى مو قادر أتصوّر ولا أستوعب اللي صار

دخيلك قول يا ماجد ، عذاب الحب وش حلّه؟؟

تبيني أرضى بالواقع وأساير رغبة الأقدار

متى يستأذن القاتل من المقتول في قتله

أشوف الموت أحسن لي من التفكير والتكرار

ومنهو عانده حظه ، أكيد الموت أحسن له

يردك للوجع شوق(ن) ، توشّح أسخف الأعذار

ويخضع للألم قلب(ن) يهاب الطيش والزله

تراه الحب يا ماجد ، لعب بي لعبة المكّار

يعيّشني على وهمي ، ويذبحني على مهله

تبعته والألم يرسم ، ملامح آخر المشوار

نسيت إن الهوى كذبه ، بدوها عنتر وعبله

تخلّت عني وإختارت ، هذاك اللي هله تجّار

غني وفلوسه ماتحصى وعنده لكزس وفله

وأنا واحد فقير(ن) ماملك من دنيته دينار

رصيده إحترام الناس ، وكنزه خلقه وفعله

أنا بحار بن بحار بن بحار بن بحار

وأنا أملاكي ف الدنيا ، عفاف وطيبه وسبله

أنا بنساها يا ماجد ، وأساير رغبة الأقدار

وصدمات الغلا لا جات ، أساسا ً ماتجي سهله