يسعد مسا شخصن له القلب ولهان

زلزل غيابه خافقي من محانيه

لامن ذكرته ثاربي الشوق بركان

والهم شيّد في ضلوعي مبانيه

عايش حياتي بين لوعه وهجران

حتى خفوقي ضاعت أحلى أمانيه

من غاب عني عشت ياناس حرمان

محروم من عطفه وطيبة معانيه

محروم عايش بين آهات و أشجان

والشوق جرحن من غيابه أعانيه

وين الحبيب اللي سكن قلبي مابان

مسكين قلبي بالوصل دوم أمنّيه

بعّثر غيابه والجفا خافق إنسان

أبحر على مركب وفا من موانيه

شتّان بينه وبين هالناس شتّان

وافي ولكن للأسف ش اللي يجنيه؟

مرهق خفوقي من تجافيه..حيران

ودايما على طاريه فكري أعنّيه

له في خيالي بيت وأزهار وأغصان

عيّا الزمن يمحيه من فكري ويفنيه

وشلون من يزرع غلا يحصد أحزان؟

معقول حبي صار ماعاد يعنيه

ليته يحس الشوق لاصار نيران

ياليت جرّب ثانيه من ثوانيه

ماكان جافاني دقيقه ولا كان

جرّب فراقي أو غيابي يدانيه

شفت بغيابه ويل أشكال وألوان

والهم حاصرني من إهناك وهنيه

لاقلت أنا تعبان..بلعون تعبان

والقلب متعب من وفاه وتفانيه

ملعون وقتن الوفي فيه خسران

قاصيه كاذب حاله من حال دانيه

وقتن تعلّى فيه زيفن وبهتان

حتى الألم ملّ الألم في أغانيه

يامنيتي في وقت مافيه إحسان

ضاع الخفوق اللي يحبك وأمانيه

المشكله بالحيل لك صار ولهان

وهجرك تمادى لين زعزع مبانيه

الشوق فيني ثار ثوّرات بركان

والهم زلزل خافقي من محانيه