بعسّجد لك قصيدي وإلبسه شمروخ

أنا صايغ أصوغ الشعر وأرقى به

كتبت الشعر مو رغبه ف مال شيوخ

كتبته طامع بقلب(ن) قفل بابه

ف وجه اللي من الهجران دايخ دوخ

تعب يكتب على الجدران إعجابه

هنا مره كتبت إنه علي منفوخ

ومتضايق لأني ماخذ كتابه

هنا جنب البنايه من شهر مزخوخ

أشخبط بيت أوصف فيه أهدابه

حبيبي ما بقى من ه الوقار شموخ

تهاوى مثلما أشجار في غابه

وش اللي يجبر الراعي يهدّ الكوخ

ويترك باقي أغنامه مع ذيابه؟

ذبل قلبي وذاب من الهموم رضوخ

أخاف الياس يدركني ونتشابه

تعال إسمع حكاية قلبي المزنوخ

تعال إضحك على ذلي وأسبابه

تعال إجمع بقايا جسمي المسلوخ

زهق في هجرك المؤلم من ثيابه

تدّق بمطرقة هجرك إلين شروخ

غيابك في خفوقي تدمي أجنابه

وإذا حظي حرمني من مذاق الخوخ

يكفّيني أبوس وأحضن ترابه