تقول إنساني يا أحمد ، وليت الحل فـ النسيان

خلاص أرجوك تنساني ، أنا لفلان مخطوبه

أنا أرجوك ياعمري ، أبي نبقى مثل إخوان

وطاري الحب وحياتك ، أبد لاتجيبني صوبه

أحبك موت صدّقني ، ويشهد ربي الرحمن

ولكن للأسف نفسي ، على هـ الحال مغصوبه

تصدق عاد يا ماجد ، حكيها فجّر الأشجان

وكل حرف(ن) توشحني ، أحسه نار مشبوبه

كلام(ن) يجرح الخافق وصدمه تدمي الوجدان

وحب(ن) صار في لحظه ، بقايا إحساس إكذوبه

محبه إنتهت فجأه ، وعمر(ن) ضاع ف الأحزان

وذكرى ماتجيني غير ، مع الأهات مصحوبه

تقول إنسى عسى تلقى بديلي والمفارق حان

وحق اللي جمعني بك ، تناسى إني محبوبه

تبي أنسى وأنا ماني قليل الأصل أو خوّان

وقلب(ن) ينخلق وافي ، محال يبدّل إسلوبه

تبي أنسى وأرد القلب من بير الهوى ضميان

بعد ماكانت إحساسه وأنفاسه ومشروبه

تبي أنسى محبتنا وماضينا وكل ماكان

تبيني أرضى بالواقع ، مدام الفرقى مكتوبه

ألم يستوطن أعماقي ، وقلب(ن) ضايق وتعبان

وكن الروح يا ماجد ، مع الإحساس مسلوبه

دخيل الله يا ماجد ، أبيك تزهب الأكفان

أحس الموت قرّبني ، وهالساعات محسوبه

ولو حانت نهاياتي ، ودارت دورة الأزمان

أبي تذكر صداقتنا ، وشعر(ن) نفترش ثوبه

ومادام الزمن يمضي ، أكيد الحل ف النسيان

((خلاص إنساها يا أحمد ، تراها اليوم مخطوبه))