يدق الصمت ناقوس الكلام ويبتدي التخمين

تطير حروف وتقيّد غمامٍ للسما سجّان

شفاةٍ تحترق تلفظ من افواه السنين : سنين

يبعثرها الحنين وتختنق كن الحكي دخان

انا الساكن ورا أسوار حزني منتظرك تجين

أناا لأبعد من اللاممكن الأقرب من الإمكان

أنا الإنسان في داخل تجاعيده يعيش الطين

أنا الأكثر وضوح من الوضوح / الغامض / الإنسان

أنا ذاك الطريق المنتهي فبدايته تدرين

وش اصعب من طريقٍ مالقى في داخله عنوان

أنا ذاك الفقير اللي صنع من دمعته سكين

زرعها في خفوقه وابتدا يتنفس الحرمان

انا اللي وين ما وديت وجهي شفتك تمرين

كأنك تاخذينه من دفاتر غربته : نسيان

أحبك كثر ما مر السهاد عيوني الثنتين

ولا ادري وين اودي لهفتي لك لو تثور الآن

لأن الصمت ناقوس الكلام اتعلّم التخمين

شفاهي تحترق واسكت واعرف ان الحكي دخان