الجادل إللي تستفز الشعر وحروف القصيد

كل ماتجي في خاطري يجتاحني برد ودفا

أبدا وأسمّعها قصيدة تبتسم أرجع وأعيد

حتى ولو كانت تجامل يعني عن قولة كفا

عزالله إنها ساكنه شريان قلبي والوريد

تربّعت داخل خفوقٍ أحتواها وأحتفا

تمكنت مني وأنا من قبلها فارس عنيد

وأصبحت كني في يديها طفل تعبان وغفا

أمشي على مشهاتها تقول صح ؟ أقول أكيد

أخاف تزعل وأبلش بعمري وتعطيني قفا

لكن جفتني وأبعدت عني وخلتني وحيد

من دون سبّة وقمت أنادي : ليه يافلانه أفا

ياليت يوم إنها جفتني من جفاها تستفيد

لكن تجيني علومها تبكي على طاري الجفا

لاشك ندمانه ولكن كل هذا مايفيد

لازم تعلمها المواجع عاقبة قلّ الوفا

عشان تعرف كيف صرت بجامعة حزني معيد

بأسبابها يوم رحلت والكون بعيوني طفا

كم لي وأنا في بابها واقف تقل ساعي بريد

الشمس تجلدني وشايل في يدي (موية شفا)

من شافني قال إنت يامرضان ياقلبك بليد

وأقفى يتمتم (جعل من حدّك على الموت الحفا)