ياقلب كم لك وانت من حال في حال

من شفت (سارة )وأنت حالتك حالة

أنا معك حلوة ونظراتها هبال

بس الغرام الصعب مالك ومالة

ذي عندها (لكزس ) وسايق وجوال

وأنا (كورلا ) لا وبإسم الوكالة

الظاهر إن سواقها ياكل أثقال

كله عضل شف كيف يرفع شماله

تعوّذ من إبليس ذي دونها رجال

وأنا مكسّر خلّ منك الهبالة

تسكن بفلّة ماتجيلك على بال

شغل أجنحة ماهو مقلّط وصالة

مصروفها يكفي ثمانين رجّال

هذي أبوها ما درى كم حلالة

حتى أمها في ذمتي (حرمة أعمال)

واخوانها كلٍ غني في مجاله

إعقل يبو بيحلّها ألف حلال

أنا أطلب الله وأدّعيه وأساله

إسهر وفل حجاج نبضك وإذا طال

فيك السهر ارقد مثل منت داله

وش غيّرك قد كانت أوضاعنا عال

لا رحم أبو (روبي) على (البرتقالة)

خلّوك للحسرة والآمال حمّال

ماغير جالس داخل الصدر عالة

حتى هلي من شافني منهم قال :

لا يابري حالي ويا وجدنا له

ياقلب تكفى وش معك والتخبال

إلعن ابليس وكب منك الخبالة