مبتداها باسم رب العالمين

الله اللي عالمن بالخافيات

يامعين اللناس عونك يامعين

والهدى للحق وأسباب النجات

والسلامه ياملاذ الخايفين

يوم حشر اللناس حافين وعرات

مؤمنين بالكتاب وموقنيين

بالقدر والبعث من بعد الممات

وبعد هذا عد ماجها غشيين

ومارهشن سود السحاب المرزمات

وعد مابالبيت طافوا محرمين

وغنت الورقا برووس النايفات

ياسلام الله سلام المخلصين

للولات وللبلاد وللدعات

والتحايا ثنها للطيبين

الرجال أهل العلوم الطيبات

جيت من حايل وانا كلي حنين

للرياض العاصمه رمز الثبات

جيت من حايل وربعي واقفين

وحملوني لك سلام ولك وصات

قل لأبو متعب ترانا حاضرين

رهن إشارة من زبون الوانيات

ياولي العهد ياذرب الليمين

ياعضيد الفهد وقت الملزمات

يازبنا ياعشير الغانمين

ياذرانا عن سموم الذاريات

جيت مع ربعي تميم مجددين

للولاء وقت الرخاء والنايبات

يشهد الله للسعود مبايعين

في رضا المعبود رب الكائنات

والوفاء فينا لكم دب السنين

ثابت مثل الجبال الراسيات

وفي ولاءنا وانتمانا صادقين

في السنين الماضيه والمقبلات

وكلنا ياسيدي متكاتفين

كلنا ضد الخوارج والبغات

والله انا مانهيد ومانلين

لين راع الكيد يربط بالصفات

قالها المقدام عوق المعتدين

نايف الضرغام لطام الطغات

مانحاور مانحاور مجرمين

ومانفاوض معتدين ولاجنات

يروعون الآمنيين الغافلين

وبالظلام يفجرون مجمعات

يزهقون أرواح ناس مسلمين

ويقتلون صغار سن وسيدات

ياوطنا كل ابونا صامدين

ياوطنا ماعليك مساومات

ويالرياض العاصمه لاتجزعين

دونك عيون على آمنك ساهرات

ماعلينا من كلام المرجفين

شرذمه شر وشياطين وشات

وماعلينا من كلام الخاينيين

مهاترات في قناة مهاترات

ماهم أهل إصلاح ذولا مفسدين

زمرة تنبح وتسعى للشتات

ساقطين وفاشلين وتافهين

منكرات في بلاد المنكرات

ولايظل ويتبع أبليس اللعين

غير شخص فيه ست من الصفات

قل عرف وقل علم وقل دين

وقل خوف وضعف نفس وخبث ذات

والجهل يعمي عيون المبصرين

والفتن تررد لأمور مهلكات

أنتبه يابن الوطن خلك فطين

أحذر أهل الزيف وأهل الشايعات

والله انا في نعيم عايشين

في رغد وأمن ورخا وأحسن حيات

تحت ظل الشرع والسيف السنيين

من حدود طريف لجبال السرات

عايشين معززين مكرمين

في وطنا والحقايق بينات

نحمدالله للأله موحدين

والحدود تقام وتقام الصلات

والمساجد من يسار ومن يمين

والمياة من البحر مثل الفرات

والمدارس للبنات وللبنين

والوظايف للبنين وللبنات

نحمد الله مسلمين مسالمين

وفي وطنا من جميع الجاليات

مطمئنين بوطنا وآمنيين

من خلقنا مانعرف مظاهرات

ماعلينا من رعاع ضايعين

بالشوارع يرفعون اللافتات

ونطلب الله كل وقت وكل حين

ينصر الإسلام ويعز الولات

جيت من حايل وبيحت الكنيين

للزعيم الهيلعي وادها الدهات

قلتها والله يمين الله يمين

كلمة لله مادور هبات

وختمها صلوا على طه الأمين

ما أبهل الوسمي وماخضر نبات