وقتً مضى يا قرقعه جبت الابيات

واوميت بالسبحه ومسيت عمتك

يا قرقعه ما عندنا صرف عشرات

دوّروتلقى غيرنا يصرف ميتك

ما اسطى على ذم العرب وانت باذات

ما اسطى على ذمك ولا امس لحيتك

متحزمً بالصبر والصمت وسكات

لو عضني مع لحيتي ناب لحيتك

سيفي بغمده والبواريد مركات

عسى الولي يدفع بلاك ومصيبتك

لا عيال عماتً ولا عيال خالات

ولا نيب من ربعك ولا من قربتك

ان طعتني سكّر جميع الملفات

لا تقص جرتنا ولا نقص جرتك

ما ودي اضرب في يديك الكلبشات

لين امسكك متلبسً في جريمتك

وكانك تبين اذبحك وقع قرارات

عطني ديتك بيدك واعف بوصيتك

الناس يبن الناس قشران واعصاة

لا ضمتها يا طيب الفال ضامتك

واحذر ترا غوص البحار العميقات

يقطع نفسك وعمقها يقطع ريتك

وكانك من اللي يقطعون الاشارات

بالحال نسحب رخصتك واستمارتك

يا قرقعه وابليس ما مات ما مات

لا تتبعه يعمي بصرك وبصيرتك

لا لا تروح ايام عمرك حسوفات

اغنم حياتك قبل تدنى منيتك