لك جزيل التحايا والثنا والسلام

من خليل ابراهيم الناصر الشبرمي

قطري الهوية والقبيله سنام

ودار جدي سميرا ولتميم انتمي

ربعي على الدجال شذرة حسام

في صحيح البخاري واحمد ومسلمي

وباختصار العباره لايطول الكلام

الجزيره ثلاث ارباعها محزمي

ما اعتقد من يهيم بحب ربعه يلام

كل حي بناسه يفخر ويحتمي

الرجال مخبوره والبلد به نظام

لو سمعنا هدير ولو سمعنا رمي

لطول الارقاب سيف وللمناخر خزام

وللكبود المغله خنجر حضرمي

زان بدع القوافي والطريق استقام

غردي يالحمام ويالغمام ارزمي

وياذلولي دفعتك بالسعه والزحام

زرفلي فوق صدر الجاهل ودرهمي

ما يميل الشداد ولانفك الخطام

لو يثور الكتام ودربك ملغمي

يا عميلي توقع واحذر الاصطدام

حيتك ذيلها والراس تحت اقدمي

وانتبه لا تجي بين الفضا والظلام

ننقش من الصخر وانت اكتب بمرسمي

وموترك دام دربه بين جرف وعدام

انتبه للرديتر ماه لا يحتمي

وكابتن الطايره لا قلع والاجوا عسام

لا تذكر هبوط الطايره يندمي

كل شيٍ له الله لا يهينك مقام

وحكمة الصمت حكمه والحكيم ابكمي

الآ نام احترمها تحترمك الأنام

وان حقرت الاوادم ما احترمك آدمي

يا ابن الاجواد جنب عن ملام العلام

لا تتيه البصيره والبصر ينعمي

يا ابن الاجواد صحصح لا يطول المنام

وخل الانوار تدخل كهفك المظلمي

العن ابليس وابعد يا بعيد المرام

السلامه غنيمه حظ من يسلمي

وبنكنا لا بغيت الصرف وقت الدوام

نصرف الشيك بالدينار والدرهمي

ولا نطق الكلبشه دام الامر اتهام

لين نلقا الدليل وبصمة المجرمي

من زرع تين شوكي ماجنا تين شام

وبكْرٍ العام جلدت هالسنه ترجمي

لا تعدى الحدود ولا تعض البهام

الله اللي بخلقه والعباد اعلمي

وكانها زله وزلت وراحت سلام

طعني ابعد ولا تنبش ولا تردمي

واعرف اني على العيّال شرس انتقام

وافهم اليعربي واترجم الأعجمي

تكرم ديار لاجل عيون يا ابن الكرام

وناس من شان ناس اتقدّر وتحشمي

ومن تبصر تعلم والليالي علام

والزمن مدرسه ودروس ومعلمي

والمواقف تجارب والعرب ما تضام

كم غشيمٍ فهم لوكان ما يفهمي

قال انا الذيب الامعط والخلايق نعام

وسن نابه وخلوه الرجال اثرمي

احذر العاقبه والعاقبه بالختام

تلعق الدبس والا تجرع العلقمي

وراعي الدين لامنه نوى الالتزام

سدده قصد قصد ودفعه مقدمي

وكان راسه عنيد وبالخطا مستهام

يضربه بالصفات ويشرب القلزمي

ان حكينا ندمنا وان سكّتنا حرام

تايه الراي لازم يردع ويلجمي

ولجميع القبايل بالفواد احترام

واحمد الله تعالى دامني مسلمي