ياهجوسي عقب كيف الشاذليه

اطرقي القيفان يوم انك رويتي

لك مهابه يالهجوس ومقدريه

استوت كل المشاعر وستويتي

شاعرٍ مطنوخ وابياتي قويه

والشعر يامسهله لا قلت بيتي

كنه المسباح لا طاح ابيديه

العبي يابنت فكري لا اشتهيتي

ابدعي المسحوب والا السامريه

والهلالي والهجيني والخبيتي

الشعر عن بكرته مني وفيه

ومعجب ابشعر النصافي والثبيتي

وعقبها ياشعر لا تبخل عليه

وعلم دياري وقول انك وفيتي

ديرةٍ تسكن مع قلبي هنيه

يابعد حيي وحيّاني وميتي

يابلد قدرك تعدّا الجاذبيه

فوق رووس الشعب يادار اعتليتي

واحمدالله وشكره رب البريه

يومني مسلم وجنسيتي كويتي

اتفاخر بالبلاد الحاتميه

ديرتي ارضي وناموسي وبيتي

علمي كل الديار الاجنبيه

علميهم كيف فن الاتكيتي

الايطالي والفرنسي والبقيه

مثل قبرص واليوناني والسوفيتي

يوم غيرك عاش وقت الجاهليه

انتي ابعهد الحضارات ابتديتي

ولايهمك شعب هيه وهاي هيه

تيتي تيتي زي مارحتي وجيتي

وباقيٍ كلمه وسميها وصيه

اسمعوا ياناس وييش ايقول بيتي

لا لقيتو شخص مامثله وزيه

اعرف ان الشخص جنسيته كويتي