ذعذع الغربي هواه وشاقني ذعذاعه

والنسيم العذب يرسم صورتك يالغالي

وكل ماتطري عليّه يوم والا ساعه

رحت اجر الصوت واحذف غترتي وعقالي

جيت طيّرت الخفوق وسرّني مطلاعه

بارك الله بالغرام ان صار وضعه عالي

مالكٍ قلبي ولا لك غير سمع وطاعه

جعلني فدوة غلاك وحكمك الليبرالي

اعشقك واغليك يانبض الحشا واوجاعه

كن قلبيلك وطن عشاق وانت الوالي

دايم اجيلك غلا مايوم جيت اطماعه

لاذكرتك سقت رجلي البيتكم طوالي

لو مشاويرك دوامي ماشكيت اوضاعه

اي واحد من يعرفك ماقعد بطالي

ياذهب يامعجزه ياجوهره لماعه

ياخشيف الريم يافلته ياسكر حالي

لو تركت البنطلون وتلبس الدراعه

ارتفع سعر الثياب ويقعد البنطالي

شفت راع الذود لا استانس على مرباعه

كنها فرحة خفوقي لا مشيت اقبالي

ولا تكابر دام قلبك مشتهي مرجاعه

مايخليني حشاك ابحلّي وترحالي

بيننا ربط المواصل ثابتٍ بطباعه

ارتباط الشمري بعقاله الميالي

الجفا ملعون خيّر لو تزيد انواعه

والمفارق مايجامل جعله السلالي

واحدٍ مثلي غرامه ملتوي بذراعه

ويش اسوّي وانت بخلافي تمس احبالي

فوق كل اللي حصل جوارحي فزاعه

تدحم اللي كل ماشافك يروح ايلالي

ومن يسولف بك وانا حاضر كسرت اخناعه

دامني من روس قومٍ تدحم العيالي

وان تمادى شتّه ابرجلٍ ماهي مرتاعه

مثل شوتة دالبيروا لا عب الايطالي

ماقدعت امن القدوع ومهجتي ملتاعه

تقصر الفنجال عني والدلال ادلالي

بوش واقف ضد تخصيب احمدي واشعاعه

ومن يشوف اشعاع خدك حاربك طوالي

انت بحر الحب من موجه الياخر قاعه

جعل شخصٍ ماعشق حلياك ماله والي

الزقاره تلتهب من لاهب الولاعه

ابك قرّب ليمتى والحال هذا حالي

دق تسعه مع ثلاثه وارفع السماعه

من سواليفك ياروحي فاطمٍ جوالي

بس تكفى لا تدق الا حدود الساعه

تسع والا عشر واصلني ويزيد اهبالي

من غلاك الجو متعه ياحلو امتاعه

وكل ماشوفك يصير الجو جدٍ عالي

ومن يعيش الجو معك ولايدق اسماعه

ليت قلبي مثل قلبه مدلهم وسالي