مرحبا ياصاحبي يامرحبا

لي متى هذا الغلا صلف وكسير

هو جفا والا زعل والا غبا

انتشي عندك وتعلنها هجير

يالطيف الروح امر وش تبا

انت تدلل بس يفداك الكثير

لو تبي الثنتين ياعنق الضبا

قلت تستاهل ولا غيرك نظير

دامها وصلت الى حد الزبا

من جمالك كل صعبٍ يستخير

الخدود ورود والفم اعنبا

والرموش جيوش والحاجب شطير

انت غير الناس انت واحد ابا

يشغل العالم وهو توه صغير؟

لا تطول السالفه الصد ايهبا

ارسل اشواقك علي مسك وعبير

النبا ياحلو ياحلو النبا

شوفتك جنه وصدك زمهرير

لو يجور الوقت حبك لي صبا

ارسل اللهفه واسابقها مسير

كثر حزن الناس حبك في دبا

وكثر نوم الخالي مرتاح الضمير

حبك بقلبي حبا حبا حبا

استحل القلب لين اصبح كبير

والبلا ماهو حلال ولا ربا

البلا انك غير والاجواد غير؟

ولو تظن ان الهوى اصبح وبا

رح لي الله خاطري منك كسير