احذر ضياع الوقت والوقت لا ضاع

ماتدركه لامن فرط منه ساعه

تلعب به الايام من بين الاصباع

مابين ريضة خاطرك واندفاعه

كم واحد ودك تدله ولاطاع

حتى يشوف الوقت ضره ولاعه

والوجبة اللي بين جايع وطماع

حظ على الله وصلته وانقطاعه

ومن لايداري مع هل الوقت الاوضاع

اجزم علي في معتركها ضياعه

وحذر على ماقال تضحك بمرتاع

يروعك اللي هد حيله وراعه

واللي لجور الوقت يرمع بالاصباع

تاكل حلاله بالفلاة السباعه

ولا تصير بكل الاحوال جزاع

المؤمن إيمانه علاج ومناعه

الوسم ينبت بالثرى ممحل القاع

وافهم ترى وسم الرجال القناعه

وهمة كريم مامعه مال وقطاع

همة شجاع والشلل في ذراعه

مانال فضل الطايله قاصر الباع

حتى ولو هو بالاذى طال باعه