يامملكة قلبي وروحي ونجواي

والهاجس اللي يبعد الناس وأدناك

عليك أهز الراس وأعضض شفاي

وإن غبت عني في خفا قلبي ألقاك

وأصافح دروب الغلا وأسبق خطاي

أسابق شفوفي على كل ما أرضاك

أمد لك في غفوة النوم يمناي

وأن قمت أحلي طعم ريقي بطرياك

عطشان في حبك مواريد مضماي

أضما على شان إني آرد على ماك

يا شمس صبح الحب يانور دنياي

في ليل عمري ياقمر شع مسراك

يافرحة أيامي وياعيدها الجاي

قبل أعرفك كنت أتخيل حلاياك

وأِشوفك أسرار تجول بخفاياي

ما تأمرك حب ولاقلت:تنهاك