ادلهم الغيم يا بارق الوسميه

والزهر نشوة عبيره تسوق اطيابه

كل عام ودارنا بالحيا مسقيه

مرحبا بالغيث لاهل يا حيّا به

بشروا به راعي الذود والطرقيه

واليتاما والمساكين والحطابه

والكرام اللي بحكم الفقر مبليه

والمريض اللي تدانا وشق ثيابه

مرحبا يا قايد اسرابنا الجويه

سيدي سلطان ستر البلد وحجابه

ياوقار اللي سجد حزة الفجريه

من خشوعه دمع عينه سقى محرابه

ياوطن من لا وطن له ولا حريه

يادفا اللي بين الاجناب ماله لابه

يا وفا يا جود يا عطف يا حنيه

ياصهيل المجد يارايته وكتابه

والله انك لا اعتزينا نهار الهيّه

سيفنا اللي كلنا في اللقا نزها به

ماخذيت المجد يا سيدي عاريّه

ماخذه من راس شيخٍ نحسب حسابه

ساقها والليل موحش على الدرعيه

لين نوّخ عند باب الرياض ركابه

ليلة فيها برمحه ترك ماريّه

ضمّها المصمك وكل الفخر منتابه

كيف ما يفخر وجرحه يشعشع ضيّه

في سما التاريخ طول الزمن يحكا به

من يمين اللي رحل والمواقف حيه

فعل ابو تركي وكل الوطن غنّا به

يا وطن ذعذع هواك وجذبنا غيّه

وانت عشقٍ كل من مات به يحيا به

كلنا في ساعة الضيق لك جنبيه

لا عصبنا الروس لك يا وطن بعصابه

يا معلمنا ليا اشتبّت البريه

نستلذ الموت وقلوبنا وثّابه

من تزعزع عنك لا رحم ابو واليّه

لين حدك من دمانا يسيل ترابه

ارجهن الليل وديارنا محميه

والسحاب اسبل على النايفات اهدابه

قلت ياغيم المطر والعطر والفيّه

انشدك يا فاتن النسمه المنسابه

من شبيهك في البشر ياكريم الجيّه

لا عطى من مدته تسفهل اعشابه

قال ابو خالد خلد ذكره وطاريّه

الكرم سلطان ساسه وكفه بابه

غردي فوق اخضر الغصن يا القمريه

بيرق العز ارتفع والنجم هلا به

في ديارٍ تحت حكم الفهد مرعيه

طوّع لها المستحيل البعيد وجابه

اكمل العشرين بالعزم الجديه

لين صحّى مجد بلقيس بعد غيابه

والعضيد اللي على القدس ساق النيّه

من صلاح الدين اخذ محزمه وحرابه

كل ما ميّل عقاله يمين شويه

ترقل عظام الشجاع القوي ويهابه

حي ابومتعب ليا قادها يا حيّه

والحرس سيفٍ بيمناه شد نصابه

شاعرٍ باسم الفخر يسرج القافيّه

من جنوب وكل حرفٍ يسوق اعجابه

قلت اذب عنانها وامسك العذريه

والقصايد فيك ياسيدي مرتابه

مرحبا في ديرةٍ روحها مسبيه

في هواك ان غبت طول السنه منصابه

ديرةٍ على النقا والولا مبنيه

اهلها من دون حد الوطن حرّابه

شامت ل.. مشعل وهي بالفخر مكسيّه

صامل الوقفات ليث الوغى وشهابه

لا ظهر مثل اشقرٍ هد للعصريه

الظفر فعله ونجم الجدي مرقابه

لا نصاه المشتكي حاجته مقضيّه

خمسة اعوم لمع نجمنا باسبابه

في حضورك سيدي فرحته مثنيّه

وانت وجهك بالسعد يبتسم لاحبابه

باسم ابو همدان والعان والياميّه

مرحبا يا تاج راس الوطن وحجابه