من البارح ينوض البرق شرق وديرتي تختال

ترقّب جيّته من عقب مالاحت تباشيره

لفى كن السحابه مهرةٍ بيضا وهو خيّال

يشد عنانها ويقودها من ديره لديره

تبنّا وانحدر وبله على روس الجبال وسال

وانا ادري انه ليا شح الزمان يجود من خيره

يقولون الكرم ميزه وانا اقول الكرم رجال

تسمّى باسم سلطان العرب سلطان ماغيره

هلا بك ياعريب الجد تاج المجد والابطال

سليل اللي رقا فوق النجوم وسيرته سيره

عظيم وحّد الشمل ووقفنا له وفا وإجلال

مثل ماشعشعت شمس الضحا من صوت تكبيره

خلد في صفحة التاريخ يوم ان الرجال رجال

بسيفه قوّم الدنيا وقعدها بتفكيره

هذاك اللي تعزوى يوم شاف االجال صك الجال

نهار الخيل غارت والوغى دقوا على زيره

عقيد القوم يوم انه تحدى يشرب الفنجال

ظهر صقر الجزيره والصقر تعرف مظاهيره

نشوفك ونتذكر وقفته طيب وفعل واقوال

ونرفع بك منارات الفخر ونعيد تسطيره

من العام نتحرى جيتك ياوافي المكيال

سنه غيّبت عنا والسحاب ابطت شخاتيره

سنه والعان ينشد والرمال تردد الموال

سنه والوادي اجدب من سنه لا.. ماسجع طيره

سنه والله ماغيّبت دامك حاظرٍ في البال

وانا لاقلت ابو خالد يخون الشعر تعبيره

تزول الراسيات وحبنا لك سيدي مازال

سكن عوج المحاني والوفا يرعى مغاتيره

ليا منك سكت اشوف فيك من الجبال جبال

والامنك ضحكت احس ضحك الناس تكشيره

وطن حب و رضا رب و فرج كرب وبراد ظلال

سما عز وغلا كنز ومتاهة لغز في حيره

ليا صحنا على حد الوطن باسمك تجي في الحال

تشب الارض نار وخصمنا يبشر بتدميره

على حد الجنوب اسرجتها لك والهلال هلال

على نوره سريت وكل دربٍ زاد تنويره

باسم صقرٍ تعلاّ في الوديعة نايف المنزال

رفع راس القصيد بهيبته وبحسن تدبيره

باسم مشعل ونجران وهله جيتك معي مرسال

عليه من الغلا تاج زهاك وزان تصويره

هلا وارحب هلا ياسيدي ماجور ويش الحال

تحية لابةٍ دونك تسوم ارواحها غيره

هلا بك عد ماشفناك شامخ والوطن يختال

هلابك والحيا ياسيدي لاحت تباشيره