لازال فيني حطب قادر على الإشتعال

لازال فيني شعر لازلت قادر عليه

والشعر سحر الكلام وهمهمات الخيال

غامض ولا ينتبهله غير قلبٍ نبيه

يجي كأنه سحابه والسحاب احتمال

اما احتواه المطر والا الظما يحتويه

كم شاعرٍ في أجاباته يضيع السؤال

وكم شاعرٍ يبتديه ولا عرف ينتهيه

والتاجر اللي معه سلطه وهيبه ومال

يموت ما يكتب حروفه ولا يشتريه

وانا يجيني رضا والا أجيه احتيال

اعرف متى آودّعه واشتاقله والتقيه

حسان ياموعد الممكن ووعد المحال

حسان ياحلمي اللي كل يوم احتريه

شفني تعدت ثلاثيني سهر وارتحال

والشيب يطري علي احيان واطري عليه

جيتك وكللي وصايا لا تأخر تعال

أقولها وانت رتبها وخذ ماتبيه

إياك والحب يلعبّك يمين وشمال

لا تنحني للهوى والقلب لا يشتهيه

واياك والصاحب اللي ما عليه اتكال

هذاك احذر يدينك لا تصافح يديه

واياك تقضي حياتك بين قيلٍ وقال

حكي مجالس وهذا فيه وفلان فيه

واليا لبست العقل لو مالبست العقال

عقلك ستر والمظاهر ماتفيد السفيه

وإياك إياك ثم إياك ذل السؤال

وإن هنت لا ما تفيدك ليه لو قلت ليه

واحذر دروب الحرام إن ضاق درب الحلال

اصبر والانسان رزقه لو تأخر يجيه

واحذر لو الناس من حولك عمام وخوال

الورد يندس فيه الشوك مما يليه

لا تخاوي إلا ظلالك ياخوي الظلال

في الناس مايشبهك غيره ولا لك شبيه

خلك وسيع المدى خلك بعيد المنال

والحظ لا تلتفت يمّه ولا تشتكيه

وإن ضاقت الأرض في وجهك توجه شمال

لديارك اللي بها تلقى كرام الوجيه

هذي وصايا قصيدي والقصيد احتمال

أما احتويته وفا والا التعب يحتويه