وارتب افراحي مع احزاني قبل لاانام
واصحى..
والاقي الخوف_كالعادة_ مرتّبني
واللي يخوّفني من الأيام
يا جاهلٍ باللي مخوّفني..
يومٍ بدون احلام
أهدم بها..وابني
ويومٍ..
أعيشه بين أحضان الكتب..
خلٍ لقى خلّه
واهجر (كتاب الله)
ويومٍ..
تحاصرني السنين
واسرح ..أقلّب هالسنين
وتشوفني ساكت حزين
أزعل من اتفه شيْ
ما غير اردد كلمتين:..
الموت ..حىّْ وحيّ
***
واكذب على نفسي.. واقول:
الشعر..مفتاح الفرج
ومع كل بيتٍ أكتبه
يمتد هذا الخوف لين اطراف أطرافي
حتى أحس ان النجوم عيون
واحس كني عاريٍ.. حافي
يا جاهلٍ باللي مخوّفني.
ما تدري اني أدفن (ف )درجي
قصايد فاتنه
أبسط أغانيها ..شجن؟
خايف أغنيّ حسنها
ويكبر الجمهور..ويقطع يدينه..
وانسجن
***
واسأل يديني..
أي أقلامي كتب هال "خ..و..ف"؟
مرّة تقول :القلب
ومرّة تقول: العقل
ومرّة تقول :الشوف
بس الأكيد انه "ثلاث حروف"
***
وتسألني :كيف آنام؟
والخوف نظراته تحاصرني
يا جاهلٍ باللي مصبّرني..
للشاعر اللي يختبي في كل حرفٍ يكتبه..
تفاحه ..وشيطان
الخوف مفتاح الأمان
للشاعر اللي لا مشى من خطوته
ضاق المكان
الخوف مفتاح الأمان
للشاعر اللي ف.. كل يومٍ ينولد
وقبل يتكلم ..ينجلد
الخوف مفتاح الأمان..
الخوف مفتاح الأمان..