ابتسامي / دمعتي ياموعدٍ لا مرّني صدفه .. ولا جيت احتريه
باسطٍ عمري كفن من ياس .. كني ف آخر ايّامي ويمكنّي انتهيت
ما لمحتك في بداياتي وانا اللي من عرفت الحب كل يوم ابتديه
كم ترابٍ كنت افتّش فيّه عنك كم حرثت وكم زرعت وكم سقيت..؟
ماوصلتي ليه .. ما مرّ القدر حتى طرف صوتك ولاخمّنت ليه
لو قبل ليله ندهتي بس ليله كان ماودّعت هالليل وسريت
من بديت ارسم " علي " ما عوّدوني ابني الواني بنفسي واستويه
لون يختاره هذاك ولون من هذا وذولا لوّنوني وانبنيت
لانويت آخذ مكاني .. شتّتوني ف زحمة العادات لين اصبحت تيه
ما اقدر احكي وين سمعي وين شوفي كيف اشم وكيف احس ليا نويت ؟
جاوبي " يا حصة التعبير ، يا درس الحواس الخمس " والطالب نبيه
ضاع وقتي ليتني ضلّيت جاهل لا درست ولا كتبت ولا قريت
انحني للي يبونه والا انا كومة جسد ما فكروا في اللي يبيه
جهزوا دربي ودلّوني عليه ولبّسوني خطوتي غصب ومشيت
كيف احبك كيف ؟ ماقدر / بس انا احبك ..وهذا السر ما سولفت فيه
لا تلوميني على صمتي وفا لصياحهم لوميني ان خنت وحكيت ..
يا حنين الأم .. ياوسادة طفل مبلول بالأحلام .. يارعشة يديه
يا مراجيح الندى بين اغنيات الصبح .. يا شِعرٍ تناثر بيت بيت
وين اودّي وجهي من الدمع لو حس بمناديلك ولا زلت اشتكيه
وين اودي وجهي من البرد لو حس بدفا حضنك وتوّي ما ارتميت ؟
شاغلتني مابقى في الحاره جدارٍ حزين الا نقشت اسمك عليه
حرف حرف .. ولو سألني عنّك اصحابي ..تمايلت وعلى مهلي بكيت
ودعيني .. ودعي ضحكي وتخريفي وهمسي حتى صمتي ودّعيه
لا تخلّي في الزويا شي من صوتي .. انا اللي خنت لو قالوا وفيت
بس قبل توادعيني واعديني انّي ابقى الشاعر اللي محتويه
واني ابقى طفلك الغافي على صدرك .. ولا تضمّين غيري لو صحيت
