كاميرا هالشعر من يوم ارتكبته

لمّني مثل الصور : مشهد وذكرى

يالله اسهر وآتناول ماكتبته

وافتح البوم القصايد فيه واقرا

هذا انا ف اول قصيدة كنت نبته

توّي اوراقي عطش فاغصان خضرا

وهذا طيشي يوم انا طفلٍ لعبته

في سما الجهرا تركت العاب قمرا

وذاك ليلي .. شفني من جفني حطبته

وانجرحت ورحت اشبه دمع وابرا

عن يميني ماضميت اسم وشربته

وارتويت .. إلا ارتميت احلام قفرا

وعن يساري مر حلم ما حسبته

في الأسامي وابتسامي ريح يسرى

غربتني في الشعر لين اغتربته

وان سريت البس ثياب الصبح مسرى

علمتني فتنته حتى ونصبته

في الثرا .. وارتدت الواحات قفرا

لا هما صمت الضما حولي سكبته

وانتشر صوتي شجر باطراف صحرا

من يدين الشمس كم مشط نهبته

كل ما آسرح جدايل بنت شقرا

إن كتبته سهل .. كم صعبٍ غصبته

وان غصبني .. إن بعد العسر يسرا

لويجي صديت .. وان صد اغتصبته

ما يصد الا " البكر ".. والشعر عذرا..

هذا شعري .. ماتلوّنت وكذبته

كيف تبيض الصور بوجيه سمرا

بعض منّي شفته وبعضي شطبته

ليه شفته .. ماادري ليه .. الصوره أدرى