ياملّ عينٍ يعلّ الجيب ذارفها

اربع وعشرين ساعه تهجل اهجالي

والنوم يا دحيم عايفته وعايفها

دارت سنتها على سِهْر وتملاّلي

مدري على النوم عيني وش مكلّفها

للسِهْر في نونها ممسى ومقيالي

واللي جعل نوم عيني ما يوالفها

واهج لهيب الغرام اللي برى حالي

واحالي اللي طهوم الشوق ناحفها

ماباقٍ الاّ عظامٍ جسمها بالي

عليك ياللي غلاك الروح متلفها

ياللي محلّك بوسط القلب نزّالي

غلاك نفسي عن الخفرات صارفها

لو يجمعن لي من اولهن الى التالي

لك سيرةٍ بالمحبّه ما اقدر اخلفها

لو هي سبايب سهر عيني وغربالي

الاّ رجا ساعةٍ ما اقضي حسايفها

والاّ على السنّه السمحا تهيّالي

رجعت للسالفه واحييت سالفها

اللي يقولونها في ماض الاجيالي

اللي سبب موت ضيف جديع ماقفها

حيث ان ذبّاح ضيف جديع يبرى لي