يا كان من ليلة على أرضك تساويت

عيا وفاقك لا يلايم وفاقي

لو كان فالضيفان ما قد ترديت

وجوك متيع و تعتني بالطراقي

من يوم طبيتك و أنا ما أسفهليت

لعل ما يبقى لأهاليك باقي

حاولت أوسع خاطري فيك و أزريت

بيني و بين أطباع أهلك انشقاقي

واليوم غاية رغبتي لو تمنيت

فرقاك و أنته ما تبى إلا فراقي

واللي على بعده من البعد حنيت

وينتابني عقب الحنين اشتياقي

نجد وهواه و شوف هاك السباريت

اللي لها في وسط قلبي رواقي

ومنادمة روس الرجال المناعيت

كل أبلجن له فالطويلة مراقي

ولحدٍ يواخذ ني ليا قلت هاويت

وضح ٍ تفرق ما اجتمع من ضياقي

وضح ٍ ليا مني من المدن مليت

معها انشراحت خاطري وانطلاقي

أما ليا سندت و ألا ليا نحيت

مع درب براق ٍ سر اله شعا قي

برق ٍ سرى يوضي كما يوضي الليت

بعروض نوى ٍ ساق مزنه وساقي

وتعرضه من رايح الشرق تثبيت

يثني على الريض أرقاب السباقي

ليا شفت براقه على سيله أرهيت

بيض مراهيشه مطرها حقاقي

تذبح لها حي ٍ و تحييلها ميت

وتصبح به الوديان مثل السواقي

وأما تحاسنت العساسه و عسيت

ومشيت مع سيله و نبته دقاقي

وألا على دربه ليا أصبحت شديت

وخليتها تاط الحثم و الرقاقي

وضح ٍ ليا احتست و شافتني أنويت

قامت تسوق أنفوسها ما تساقي

تنجال مثل الصيد لا صحت وأوميت

وألا ليا طق اللبيد العراقي

يجيك ممشاها تبارى تفاخيت

مافي بعضها عن بعضها انفهاقي

ولو حال من دون المعشى مراريت

ترهي عليه معربات العماقي

من ساس وضح ٍ فالجز يره لها صيت

على مخاذعها تلوح الحلاقي

وليا تثنت في نبات السواريت

في خايع ٍ لأرقاب نبته زراقي

غادي بوسطه لأم سالم زغاريت

وفيه الزبيدي مثل بيض الطواقي

ثم جيت فأولها وللنار شبيت

وقضب عراقيب الدلا ل الشلاقي

ما غبطك يا للي فالحضاره تلويت

يا موالف الجدران ويش أنت لا قي

لو كان فالحصن الحصين استكنيت

وتقول أنا مرتاح مانيب شاقي

كانك على هالأنطواءى استمريت

وسويت مع بث القناة اتفاقي

أما من السكر شبعت و ترويت

وألا بصرك أوشك على الاحتراقي

سج النفس واضرب دروب الخراريت

لو ما تذوق مع الخلا ما يذاقي

ما ينطوي في غرفة ٍ فأخر البيت

غير الذي راسه يبيله عراقي