ياطير عقبي كن خاطرك شاين

خاطرك شين وغيبتي عنك يومين

النقص فيك مبيّن له بواين

في لمعة الريشه وفي ناظر العين

ياطير انا ويّاك كنا خداين

وبيني وبينك ولف ومعامل ٍ زين

يوم انتخاوى مع وجيه الضعاين

ونهمل سبوقك في مناكب خسيرين

وألا شمال الهضبتين القراين

شرقي طلال ومن سواحيق ويمين

وألا عطينا سكة التابلاين

ولا قد عطيناها عليها حراذين

نصبح على طارات شهب المكاين

بين العراقيين والاردنيين

في خايعن به كن عيني تعاين

ربد الحباري به على اربع وثنتين

ونأخذ لنا ايام بذيك الدفاين

مابين برقع والغدف والبسيتين

ونكسر على ماينحدر من ضواين

ونأخذ هناك اسبوع والا سبوعين

وننكف نشاط وسالمين الصخاين

ولو كان نتعب عندنا مستريحين

قدّام يطلع للصقاره زباين

ناس تحوش القوبعه بام روحين

ليا روحو بمشحنات الخزاين

مافي نحاهم ذوقوه الامرين

واليوم مابيني وبينك مداين

انا سعودي وانت جاين من الصين

وان مالقينا للحباري عواين

ولا توادعنا وداع المحبين

الوقت ماتاليه معنا بزاين

والبر في حادور من حين لاحين

ادناه مليان كراتين فاين

واقصاه ضاق وضيقوا به هل الضين

وضاقت مناهج طيبين الضغاين

اللي على المقناص بالطير ضارين

واليوم كان اللي يحاكيك ماين

هذي سبوقك وانتهض بالجناحين

وهاجر مهاجر مبحرات السفاين

للصين والا اهبط على ضلع قزوين

لو كان عندي مافراقك بهاين

حنا عزاز ولا نهين العزيزين

خلك تروح ولا تشوف الغباين

شاملك عفوِِ مثل عفو المساجين