مبداي بإسم اللي فرج عن هل الغار

اعوذ به والوذ به واستخيره

قدام تدريج المعاني بالاشعار

عن لا يجي عندي من الامر حيره

حتى تجيني طوع من غير عسار

وتنقاد لي قود الجمل بالمريره

وعلقتها في رأس دواس الاخطار

عبدالعزيز اللي فعوله شهيره

يوم إن بركان الفتن بالوطن ثار

مافيه شبرٍ ما اشتعلبه سعيره

ولا للجنايز بين الاشرار قبار

ولا به عشيره تتفق مع عشيره

حناشلٍ تاقف على كل معبار

وتحول الطرقي وتأخذ بعيره

من شرق فاجاها على هجن ومهار

هجنٍ هجاهيجٍ وخيلٍ مغيره

فوق الجياد وفوق نساع الازوار

داس الخطر واطلق حصار الاسيره

جاها صلاة الفجر والطير ما طار

بكل ابلجٍ بيديه دلماً قصيره

جوها مع الاسحار وخذوا لها الثار

وعقب العري لبست ثياب الستيره

ويوم احتضنها المؤمن العادل البار

قامت لاخو نوره تغطرف منيره

حشيمةٍ ما تقبل الذل والعار

وبه من بعض خطّابها مستجيره

وغدا لها عن كل حجيّر حجار

وسعى لها بالنصر والله نصيره

واستامنت بحماه عن كل غدار

وعن الشلل عالج عضاها الضريره

احدٍ الى جا الدار للدار دمار

واحدٍ الى جاء الدار شاد تعميره

والفيصلي للملكة شاد الاعمار

حلحيل ما سوا سواياه غيره

صميدعٍ جاها وهي تلتهب نار

وارسى قواعدها بعزم وبصيره

وعلى يد المنصور توحيدها صار

وظفى عليها الامن في كل ديره

شيخٍ على السنه نهج نهج الابرار

وعلى مخالفها يجر الجريره

عسى عضاه محرماتٍ على النار

يوم ارتحل عنها ذخر له ذخيره

وذخيرته رؤوس الميامين الاخيار

على مسار يكملون المسيره

وكل حكم له دور من خمسة ادوار

وكلٍ عدل في دوره اللي يديره

واليوم واحاتٍ مظاليل وأنهار

بفضل الولي ثم بالجهود المنيره

الدوله اللي تحترم جيرة الجار

يوم بعض الجيران يأكل قصيره

ما ساد الاستعمار فيها ولا جار

ولا عاش فيها من بذوره بذيره

حره واهلها من على اولهم احرار

في ظل شذرات السيوف الشطيره

يوم ارتحل مسقى العدا كأس الامرار

فهد عسى الله من عذابه يجيره

راح وبقت معنا حسانيه تذكار

وخلد لنا في قمة المجد سيره

كم مر في عهده من احداثٍ كبار

وصارت كبايرها بعينه صغيره

اثقل على العدوان من ضلع سنجار

ولشعبه احلا من برايد غديره

واكمل مساره طيب الصيت والكار

كشاف خصات البيوت الفقيره

عبدالله اللي عاهد النافع الضار

الخير من يمه لفانا بشيره

العدل نهجه والتواضع له شعار

ونباه يجبر له عظامٍ كسيره

على الفقارى مثل هتاف الامطار

وضافٍ على اوطان المحاويج خيره

وعنده لخصات المقلين منظار

وجزلات مداته عليهم كثيره

فأول بيانٍ له بنشرات الاخبار

قال البيان اللي غمرنا عبيره

يقول مدوني بالانصاح والشار

ومن الدعاء الصادق عطوني بريره

وحنا بنفحات التهجد بالاسحار

نطلب له التوفيق فيما يديره

وعضوده اللي فالمواجيب حضار

سواعده عند إشتعال الذخيره

الساعد الايمن ليا صار ما صار

سلطان زيزوم الدفاع ووزيره

سلطان ابو خالد له الرأي يندار

ولي عهدٍ له وأخوه وشويره

فالنايبات مجهزٍ كل مغوار

النائب الاول نزيه السريره

يقود جيشٍ للوطن درع وستار

يصد به عنا الخطوب الخطيره

ونيابةٍ عني وعن كل من زار

حفل الرياض وبإسم سلمان اميره

قدمت لي معذار ماهو بمقدار

والاّ حقوقك يابو متعب كبيره

وصلوا على سيد البشر سر وجهار

ما طوح الصقار ملوح طيره