يا بو قويعان الليالي لها ميل

ماهي بتابعةٍ هواك وهوايه

تفني لها جيل ويظهر لها جيل

ماتنتعدل في عصاك وعصايه

وأقفت على ركابة الجيش والخيل

اللي لهم تال السبايا حمايه

هل الفخر هل المهار المشاويل

اللي لهم في مركز العز رايه

وكم فرقت بين القلوب المغاليل

مثلي ومثلك يوم زمة صبايه

يوم الهوى مع لا بسات الخلاخيل

أخذت أنا وياك منه الكفايه

عشقٍ شريفٍ مع بنات المشاكيل

مابه على الهاتف يابنت قصرايه

ندرى الشرف عن راعي القول والقيل

من خوف عدوانك وفرحة عدايه

ونصبر كما صبر الزوامل على الشيل

تجحد بلا نفسك وأن أجحد بلايه

واليوم صار العشق كله تغازيل

ماعاد له مبدا ولاله نهايه

لو كان تنشد لك ثلاثة مخابيل

كلٍ يقول الماء تجيبه دلا يه

كل طمع بالسرح حتى الزماميل

لو مايحصل شي سوى دعايه

صار الغرام اليوم مسرى جماميل

وين أنت ياجمال خلك ورايه