يامناديني من البعد والقلب وهواه

مابقي فالعقل هاجوس بيتٍ من قصيد

مير دوبك دوب والقلب لاتلحق قصاه

اعتبرني في سكوتي وقلت اللي تريد

مايفيد الهرج والقلب ضايق من جداه

يمكن ألقي في سكوتي سعة شيٍ مفيد

وكان ودك تحفظ العلم وتصون الوصاه

لقّني بالك وسجّل لعلك تستفيد

ولاتقاطعني بتلميح وأقوال الرواه

العلوم أبلا براهين ماتحسب رصيد

ليلنا ليل السهر قبلنا محدٍ سراه

والسهر مخطر على العين والطاري مديد

قوم بهر دلة الكيف يامال الغناه

وشب نارٍ سمرها سمر وأوقدها وقيد

ولاتزل البن عجلان لين يفوح ماه

ودنا فنجال يبعد خوا الراس ويهيد

ياخوا راسي من الوقت لينه من قساه

والقدر يطوي من العمر وأشغالي تزيد

مير لولا رحمة اللي تعلاّ في سماه

في عباده كان يمدي عزايمنا تبيد

جل شانه عالم الغيب مانرجي سواه

والمشاعر عن مناجاة جوده ماتحيد

ماحدٍ غيره تعفر له أخشوم وجباه

فالثرا من سجدة الفرض للرب الحميد

طاعته عزه وتنفيذة أحكامه نجاه

أحمده وأشكر عطاياه رزاق العبيد

يارفيق الدرب واللي ورا قلبي وراه

لاتقارب خطوة الدرب والمسري بعيد

لاتقول اللي بديناه وصل منتهاه

وأنت لك صوله وجوله ووقفات وعضيد

أعتبرها كبوة أحصان ما خارت قواه

تجربة ما يفقه أدروسها قلبٍ بليد

وأعتبرنا سيفك اللي علي روس الطغاه

سلّنا في ساعة الضيق وأبشر بالاكيد

كل جرحٍ ياعريب المجاني له دواه

وأنت زوماتك دوا الجرح والراي السديد

شفت ذاك اللي يدور علي شقرت عصاه

فوق راسه نشقر العلم بكره من جديد

هو سوات أمقيط وأمقيط راحت به رشاه

سجلوبه مضرب أمثال ما سجل فقيد

وأنت لو ترحل فقيده لربعه مع اعداه

جعل عمرك خير وان مت في موتك شهيد

مارميته مير ربك علي الغلطه رماه

فأصبعه يطرف عيونه شقيّ ولا سعيد

غلطة الشاطر علي احماه درباله حصاه

وبعد كبرت جاك يضرب براسه فالحديد

حب نفسه والتملك علي الضيعه حداه

جاريٍ به ماجرا الدم في حبل الوريد

راكب اللي يطوى الدرب لامنه وطاه

منوه الضرمان للوصل والراس العنيد

ذاخره وقت الملازيم يوم إنه شراه

لا طرا الطاري وجا يوم تنفيذ الوعيد

لاتساوا فوق كشنه وثبت في يداه

كنه الميراج بالفعل والطرقات ميد

وارد الساير ولكزس ولا يكشف غباه

شيكوه امن الوكاله وسموه الفريد

جيب وجهه كنه الذيب والطرقة عشاه

ولا يعومس راكبه كن هزعاته نشيد

الرسالة معك والخط يحمل ما حواه

معك امانه وصل الخط للقرم العميد

ابن ناجي راعى الجود يفرح من نصاه

مامشي درب المهازل ولا حوله نقيد

فزعة الصاحب للاصحاب طيب وفرض جاه

وبورت الصاحب فالاصحاب كالذل الشديد

كيف مافزع والرفاقه لها حق وطراه

والرفيق اعداه نوقف لهم مثل الضديد

ماتربينا علي الذل من شان الحياه

ماربينا ألا علي العز والمجد التليد

أن فعلنا نضرب الروس وتهاب الرعاه

وإن عفينا من تواضع ودين ويوم عيد

والله أنّا فالمواقف كما أجبال السراه

وكان ردت للقصايد صناديد القصيد

يابن ناقي راعى الطيب مايلحق جزاه

وانت راع الاوله كل مازدنا تزيد

من رقى مرقاب الامجاد مايرغب وطاه

وانت مرقابك من المجد حيدٍ بعد حيد

والله إنك حافظ الطيب حفطك للصلاه

وراثن مجدك من ابوك وابوك العقيد

ماخسر في ربوته يوم شرواكم رباه

واصلٍ فالحق وان قالوا الصيده تصيد

اشهدنك تعرف السلّم يا حامل لواه

والشهادة حق ماهى رسالة فالبريد

ما نجامل فالحقايق ولا ناخذ زكاه

يشهد التاريخ بالعدل يالساس الجويد

ولانحط الذيب فالقدر كنه فعل شاه

وانت ذيبٍ للفعايل وسيف أبن الوليد

كل طيّب عرف يفزع اذا الواجب دعاه

مايقصر خطوته فالمواجيب ويعيد

النعاره فالرياجيل نوع امن الغناه

والشدايد تظهر الرجل والزايد يزيد

ويامناديني من البعد والصوت وصداه

أعتبرني في صدى الصوت قلت اللي تريد