من البارح وقبله ما تلاقت للمنام جفون

على باب السهر مع كل صبح يزورني ناعي

انا وضلوع قلبي كل ضلع يجر له ملحون

الا يا طول هجر وسادتي والصبر ياذراعي

يقولون العواذل وين عقلك والهوى مجنون

وانا ون جيت كلي ويش اسوي هذي اطباعي

ليا مني دريت انك حبيبي كل شي يهون

اجيك ليا عطشت احلى الغرام وتغرق اسماعي

واشوفك في فضا عيني سحابٍ كل ابوه مزون

هماليله بصدري منوة الفلاح والراعي

تكحل وامل عينك من روايع حلمك المزيون

تنزه في بساتين الحلوم وخلني واعي

سلامة عينك ام النظره الي جيتها ممنون

مودعها مراسيل الغرام ولا تبي ساعي

ترى ما كل عينٍ ساقت النظره علي تمون

وترى ما فيه حبٍ غير حبك هشم اضلاعي

تعال وهذي الوان الطعون بقلبي المطعون

ابد مافيه غير طعونك اللي ما لها داعي

ليا هب الهوى من كل صوب بصدري المشحون

سرى بي عن هوى غيرك هواك وطار بشراعي

ذخرتك للحياه الباهته لونٍ يغطي لون

اضيق من الدروب الاربعه وتجمع ارباعي