ساحل ايامي ومرسى سنيني وتعبي

من يقول ان المشاعر تجف اقلامها

ماتخونك لهجة شعور قلب اليعربي

كل ماتكبر سنينة تزيد احلامها

ماتعلمت القطاعة ولاهي مذهبي

خل عنك ان المشاعر بيدك زمامها

الغلا في نبض شريان قلبي حل بي

قبل لاتقسى علي العرب باحكامها

اذكر ان قلبي مشى لك وانا كنت احبي

وانت قبل سنين عمرك يحل فطامها

يعني انت من اول العمر سابيني سبي

لاعبٍ باشواق قلبي من اول عامها

واذكرك من يوم توك مدلل ومخبي

اتنفس من هوى عشرتك وانسامها

يوم كنت تردد انشودة أمي وأبي

قبل تخفي طلة البدر تحت لثامها

يوم اهلك يدلعونك بقولة ياضبي

انت خابر ويش سويت في ايامها

كيف ماتذكر ضماء الشوق في كف طلبي

والحروف النرجسية وصوت هيامها

والعطش يلفح بصدري وشوفك مشربي

والدروب تطول دونك واحث اقدامها

يوم اطق ابواب قلبك حياوي واجنبي

كم تثنت وردة الحب فوق ابهامها

واتحرى في دروبك ولا القى مطلبي

مايجيني من عيونك ياكود سهامها

ياحبيبي دوك كلي وقلي وش تبي

رتب اشواقي مثل ماتبي هندامها

وان هرج لك حاسد القول قله ياغبي

شفني اعالج جروح الهواى واسقامها

من كثر ما اتل قلبه وهو توة صبي

مابقى بضلوع قلبة ياكود حطامها