ما كنت اصدّق سالفة شربة النيل

الين شفت النيل بعيون هيله

حور هدبها يخجل الكحل والميل

من تطعنه بالرمش ياويل ويله

بذمامها كثرة هدبها مقاتيل

كم زورق بامواجها مات حيله

الله خلقها جيل واقرانها جيل

ما مثلها في البيض لبّاس شيله

ترسل شذاها قبل تلفي مراسيل

تسبق خطاويها مقاديم خيله

ومجدل مجنون باحضان منديل

اليا انتثر صار الف ليله وليله

ومغيربي ثغر حليو التفاصيل

اليا ضحك فاحت ذعاذيع هيله

واليا اضحكت تضحك شموس وقناديل

ونجومه السبعه تغازل سهيله

حسن ٍٍ يكذب واصفه مثل ما قيل

كل المفاتن في وصايف كحيله

كم ليلة كلمت هيله عن النيل

الين شفت النيل بعيون هيله