ابشري بالشعر ياشيخة دواوينـه وتاجه

لو طلبتي شاعرك يكتب لك من ازرق وريده

بس انا لاجيت اباكتب ينشغل بالي بحاجـه

كيف ابكتب بك قصيده توصفك وانتي قصيده

لك دلال الشعر وغيابه وتعقيدة حجاجه

بـك تغليه وجموحـــه وابتسامته العـنيده

لك حضور النور والفجر وتفاصيل انبلاجه

واسمه ورسمه وذعذاعه وطلاّته وعيده

تذهلين الخيزران بسمح قدّك واعوجاجه

تسلبين الريم فزّاته ولفتاته وجيده

تشبهين الما ولا انتي الما ولو فيك ارتجاجه

لا تشاقى طفل يلمس صفحته باصابع ايده

لا تزمّي الورد في ثغرك ويتعكّر مزاجه

من غواية شاعر ماانتي بطفلته الوحيده

واغفري للشاعر المتلعثم ذنوب انحراجه

والله ان الجرح الاوّل لكن الطعنه جديده

شاعرك ماخاف جرحه ما يخاف الاّعلاجه

لايريد اللي يقول ولا يقول اللي يريده

ما دخل في سوق الا بعد مايعرف خراجه

والنخل ساسه تحت الاقدام وعذوقه بعيده

ما علينا كلما اشتد البلا قرب انفراجه

طعنة ماتذبح الرجال يا(نوره)تفيده

بعض ما فيني كتبته وان بقى في القلب حاجه

لك على الخاطر كلام ولك على بالي قصيده