حكمة الله.. تنبت اللوعه قصايد

كلما قلب انكسر تولَد قصيده!

واشهد ان الكسْر يااهل الخير كايد

والله اللي راح للأمّه فقيده

مات (زايد).. واشهد انه عاش زايد..

في وفاه وفي نباه ومدّة ايده

مات (زايد).. واشهد انه مات قايد

ما شكت سمر السواعد ضيم قيده

مات (زايد).. واشهد انه طاح نايد

يستظلّه شعب وتظلّه عقيده

طاح مسند من تعلّوا للسنايد

راح منصى من نصى خير البديده

مات (زايد) .. وافتقدنا به فقايد

كنّ كل احدٍ فقَد منّا وحيده

وافتقده البحر والسبع الشدايد

والنخَل يتّم بعد (زايد) جريدهرفيق

وافتقده الشعب يوم انّه يعايد

والحزن يبداه في العيد ويعيده

وافتقده العيد يومه عاد عايد

ما لقاه وقال عيدي وين عيده

وين عيد اللي شكى ضيم الشدايد

وين عيد اللي بكى فرقا فقيده

وين من كفّه مثل ريش الوسايد

للعيون اللي بعد فقده سهيده

وين عيد الشعب؟.. وين الشيخ (زايد)

وين لطف الله على باقي عبيده؟

وين وجه الشيخ صدّاق الوعايد

وقّف القلب الذي كنّا وريده

عقب ما شاهدت نعيه في الجرايد

أختنق بالدمع لا شفت الجريده

يا قصيدة حزني.. اش نفع القصايد

يعلم الله.. حزني اكبر من قصيده