غيّرنى التجوال يانقوة البيض

وماغيّر فوادى لواهيب قيضه

سنّيت عمرى فى ليال"دواحيض

قرى.. محطات".. خلا.. تل.. فيضه

تركض بى الايام فى كوكب معيض

بياع شرا والمكاسب بهيضه

مثلى هميم"موترى كل ماهيض

بغناى جاوبنى حنين" يهيضه

كنه خذا منى سياط" وترويض

على الدروب الطايلات العريضه

مل السفر يومى أسنه بتعريض

لين استوى هرم" عزومه خفيضه

حلمه يريح من الشقا والعواريض

وأنا ابى كبد السما عن حضيضه

لى فى قصيات الغياهب نضانيض

عندى أمل منها دليلى وميضه

يمر بى وجد" على يمتك فيض

والا الحفر عايف شتاه ومقيضه

واد" ملوه الناس حسد"وتحريض

فيه انقطع نبت الحياة ونفيضه

مانى بمرهف للعتب والتخاويض

سمعى ومابغى قولتك ياغميضه

أمس اجهشت أمى وصدت بتغميض

ثم عاتبت حالى وكانت مريضه

وش قيمتى؟لاصرت شاعر معاريض

أطرق سخا جود النفوس البغيضه

تكفخ بنفسى زومة الكبر والغيض

مكافخ الحر النداوى بغيضه

حياتى حياة الطالبين النواهيض

الصايمات نفوسهم بالفريضه

تفرقت عشق"ورزق ومراكيض

أيامها باحلامى المستفيضه

هذا زمان التافهين الروابيض

متماشى" فيه النقيض ونقيضه

وشعرى غريب"لو فهمتيه بيفيض

دمعك وجرحى تشعرين بجضيضه