السوق ماهو سوق راعى وفلاّح

ولا تصح الا العلوم الصحيحه

عوّد على زرعك اشوف الرطب طاح

واسرح بضانك والاراضى فسيحه

مالك ومال مضارب الشيخ نطّاح

الذيب " أمعط" والذبيحه ذبيحه

تشره على جمع الدراهم والارباح

ومعلّقه نفسك بحاله كسيحه

خايف تكب السوق وتهب الارياح

والموج يصعد ويتعداك سيحه

وخايف تصير بداخله بين الاشباح

هواجسن مابين قومه وطيحه

ماتدرى انت بقمته فوق لولاح

والا بقاعه والمصادر شحيحه

غديت بيدين الهوامير مسباح

ومن صار بيدين الهوامير ويحه

ترتاح ماظنك بهالسوق ترتاح

وانت بقطيع العاثره والنطيحه

كم واحدن ولاّ وكم واحدن راح

عوّد على زرعك تراها نصيحه!