ياسفر فى ضوا بدر" حزين" أفل

كنك اللى تودع روحى بخلّها

بالمدامع بوجدى بالرجا بالامل

حارس" واشقا الحراس واذلها

نقطتى ريح فرقا همهمت وانشغل

حولها سدرها صفصافها أثلها

عاتب الله طليق" فى نكدها نزل

بات يملك جناحينه وما فلّها

لك حنين" تركنى فى ليالك طل

لكثر مارقب خيالات" مضى جلّها

بعّد وقرّب احساسى لشوفة أهل

دارهم والبرارى ربّعت كلها

أى نسمه ربيعيه بريح النفل

فى فوادى لها ترنيمة" مثلها

من بعيد" أشوف تلالها والنخل

واشعر انى وحيد الناس فى ظلها

جنّحت فى سراب" أستشفه بلل

يقطر برغبتن تنساب وابتلّها

واهمست لى حمامه ميته من قتل

بهجتك؟ واهملت عينى على قتلها

مسعد" من لقا له فى بلاده عمل

عيشة" لو تعبها ماسوا أكلها

خاليات" رعيت قيوضهن والمحل

كل شمس" تغيب آقف على تلّها

ميّس" مستميت" فى بياح السهل

علّها تقضى الايام ياعلّها

فى حياة" دعا جاثومها وابتهل

بالنفوس الكريمه لين ماشلّها

ياسفر كم عزيز" كم شقى" رحل

والفيافى مجاعات" ذوت ابلها

أبتصرها واذم حدودها والدول

واستحب اليهوديه على فعلها !