يابعَد كل الرسايل.. هالرساله

توّها ماكمّلت عمر الطفوله

طفلةٍ فيها العطِر ياطووول باله

ودّه يْسولف غرام.. و هي خجوله

مثل طبع اللي كتبها من دلاله

في مسافات الزمن و اربع فصوله

مترف ٍ.. لاجيت أشوفه شاف حاله

ماتهيّا منْه لو نظره عجوله

صار عندي راس مال.. و راس ماله..

ضحكةٍ معها عقل.. بس مْهبوووله

لاضحك كنّه مْسوّي بي جِماله

كنّي اقطف ورده و عقده و لوله

و ارسم لزوله شكِل.. كنّي ظلاله

و ارفع لسمعي يدَي..كنّي بَ طوله

كلّما حرّمته ألقاني حلاله

و كلّما عنْه أبتعد.. قرّبت أنوله

كنت أفكّر مرّه ألقى لي بداله

دام وصْلَه صعب و الأصعب وصوله

قلت : يالله نفترق كل ٍ و فاله

قال : يالله. قلت : لحظه من يقوله؟

قلبي أحلامه معه حسبة عْياله

وانت حلم ٍ توّك بْعمر الطفوله